Toute leur vie estoit
employée non par loix, statuz ou reigles, mais selon leur vouloir et
franc arbitre. Se levoient du lict quand bon leur sembloit :
beuvoient, mangeoient, travailloient, dormoient quand le desir leur
venoit. Nul ne les esveilloit, nul ne les parforceoit ny à boyre ny
a manger, ny à faire chose aultre quelconques. Ainsi l'avoit estably
Gargantua. En leur reigle n'estoit que ceste clause. Fay ce que
vouldras. Parce que gens liberes, biens nez, bien instruictz,
conversans en compaignies honnestes ont par nature un instinct, et
aiguillon, qui tousjours les poulse à faictz vertueux, et retire du
vice, lequel ilz nommoient honneur.
François Rabelais,
Gargantua.
